أبوذيـــــات

[حياتي لا طعم بيها وريحه
اكَص الكَلب بوجودك وريحه
أهدم يافا وغزه وأريحا
وأدور رضاك يلمبعد عليه

**ــــــــــ**ــــــــــ**ــــــــــ** ــــــــــ**
حبك بالكَلب حافر وناقش
وصرت نيران تحركَني وانا قش
أريد وياك بس احجي وأناقش
وكَلك لشوكت تقسي عليه

**ـــــــــــــــــــــــــ**ـــــــــــــــــــــــ**
بهجرك راح عقلي ما لفاني
مجثير اشعار لاجلك مالف اني
رحت اركض بهيمه مألف اني
ادور عليك يل رحت من ايديه

**ـــــــــــــــــــــــــ**ـــــــــــــــــــــــ**

يغايب ارد اشوفك وانتشابك
اشبك انه بيدي وانت شابك
انه من البعد عقلي تشابك
ولك بس ارجع الكروه عليه
**ـــــــــــــــــــــ**ـــــــــــــــــــــــــ**

يا ترف معجز ولا نكَدر نصف بيك
وربك بالحسن كلش نصف بيك
نصف بيه صفه كَلبي ونصف بيك
وظل يون الباقي عليه بيه

**ـــــــــــــــــــــ**ـــــــــــــــــــــــــ**
جكَاره من التتن لفلي والفلاك
مراكب تبحر بدمعي ولافلاك
الف مشطو والف غسلو والف لك
يشيلون الزلف من الوطيه

**ــــــــــــــــــــــ**ــــــــــــــــــــــــ**