قصيدة وين الزجيه - باسم الكربلائي /عوده ضاحي التميمي

وين الزجيه هاي المسيه

يا عيني سيلي يصرخ دليلي

يا زهراء

لا نجمه تلمض بالسمه لا طير رف ابجنحه

و لا وجه يطفح بالبشر ضيم و بعيده الفرحه

و الليل حط ابحنته و ضاع ابظلامة صبحه

حته الجفون اتجرحت كل جفن حاطن جرحه

الدنيه حزينه جلت علينه

زادت غليلي يصرخ دليلي

يا زهراء

**

كَالوا ابهل الليل الحزن طافح على جرفينه

و القمر مصيوب القمر سهم الخسوف ابعينه

بس ردنه توضيح الخبر نعرف الجار اعلينه

كالوا الدنيه امكدره لمصاب بت هادينه

هاي الوديعه أمست صريعه

فجّر مسيلي

*

خلها الجوانح تلتظي و القلب همه ايعصره

خلها العيون امجرحه تاكل جفنها العبره

خل تطلع انجوم الضحه خلها تلفنه الحسره

هاليوم أملاك السمه اتودع الشهيده الزهره

دمع الظليمه يجري ابهضيمه

طول يا ليلي

*

ضلع الزجيه الزاجيه ظل يصرخ امن اصوابه

و الجرح جرفين الجرح آية ضلع و امصابه

و آه يا الوديعه اشها الصبر صبرج ما تنسد بابه

و بقلوبنه يبقه الجرح أكبر امن العطابه

يطفح دمعنه يومج فجعنه

زود عويلي

*

آحاه يا نار النايبه آحاه يضلع الزهره

اشجم صدر من بعده انكسر يا هو اليجبر كسره

دنيه و عقب عين النبي صارت حزينه و مره

أول شهيده فاطمه عقبه قضت بالحسره

عقب الوصيه راحت ضحيه

هدمت لي حيلي

*

مهضومه رحلت فاطمه يا حسرة المهضومه

مظلومه بنت المصطفه بعده بقت مظلومه

و حته ورثها من فدك منه أصبحت محرومه

يا ويل من سن هالظلم يا يوم أسود يومه

لو لاقه ربه و بهذا ذنبه

اشينكر جبيلي

*

من نامت اعيون البشر نعش الوديعه اتشيع

و بليله ظلمه فاطمه من الأهل تتودع

بالله يحفار القبر خل اللحد يتوسع

لا ينلجم منها الضلع و العايله تتروع

ضلع التهشم منه اتألم
يا دنيه ميلي

****